Англия чемпиони «Лестер» Португалияда «Порту»дан 0:5 ҳисобида енгилди ва гуруҳда биринчи бўлди

Европа Чемпионлар Лигаси гуруҳ босқичида илк бор иштирок этаётганига қарамай, Англиянинг «Лестер» клуби кетма-кет беш тур давомида мағлуб бўлмаган ва шулар ичидан 4 та ўйинни ўз фойдасига ҳал қилиб, гуруҳ етакчилигини муддатидан олдин ҳал қилиб қўйганди.

Шундан келиб чиқиб, Португалияда бўлиб ўтган «Порту»га қарши ўйинда бош мураббий Клаудио Раньери асосий таркиб футболчиларига дам беришга қарор қилди. Асосан захира вакиллари билан майдонга чиқиб келган «Лестер» якунда 0:5 ҳисобида имкониятни бой берди.

Мазкур ғалаба «Порту»ни гуруҳдан олиб чиқди. Бор-йўғи 1 марта мағлуб бўлган Даниянинг «Копенгаген» клуби юришини Европа Лигасида давом эттиради.

Қизиқ томони, Бельгиянинг «Брюгге» жамоаси Чемпионлар Лигаси гуруҳ босқичидаги барча ўйинда мағлуб бўлган ягона жамоа бўлди.

Европа Чемпионлар Лигаси «G» гуруҳи. 6-тур 7 декабрь, сешанба

«Порту» — «Лестер» 5:0

Голлар: Андре Сильва, 6 (1:0). Хесус Корона, 26 (2:0). Ясин Браими, 44 (3:0). Андре Сильва, 64-пен (4:0). Диогу Жота, 77 (5:0).

«Брюгге» — «Копенгаген» 0:2

Голлар: Брендон Мехеле, 8-авт (0:1). Матиас Йоргенсен, 15 (0:2).