Райҳоннинг турмуш ўртоғи Фарҳод Алимов никоҳ маросими ими-жимида ўтишига умид қилганди

«Darakchi.uz» хонанда Райҳон билан оила қурган бошловчи Фарҳод Алимовнинг «19.09» кўрсатувига берган интервьюсини чоп этди. Унда Алимов ўзи ҳақидаги гап-сўзлардан чарчагани ҳақида айтган. Кўрсатув аввалида эса бошловчидан шахсий ҳаётига оид саволлар бермасликни сўраган.

«Тўғрисини айтсам, ижтимоий тармоқлардаги мантиқсиз муҳокамалардан чарчадим. Энг асосийси — биз бахтлимиз. Бошқа нарсани муҳокама қилишни истамайман. Севишни биладиган ҳар бир инсон бахтли бўлсин», — деди Алимов.

«Райҳонга янада машҳурроқ бўлиш учун уйланди, дейишди. Аслида мен 2008 йилдан буён клипларда суратга тушаман. Шунинг учун шахсий ҳаётим билан ўзимга пиар қилишни истамайман, мен шунчаки бахтли бўлишни истайман. Бахтли бўлишга эса ҳамманинг ҳаққи бор!»

«Очиғини айтсам, никоҳ маросими ими-жимида ўтади, деб ўйлагандим. Бироқ, бундай бўлмади, у ҳақда ҳамма гапирди. Биз уни ҳаммага эълон қилмадик. Никоҳ ошига яқин дўстларимизни таклиф этдик. Улар бизга бахт тилади. Баъзида эса ижтимоий тармоқлар орқали қўштирноқ ичида ‘бахт’ тилаганлар ҳам бўлди».

Маълум бўлишича, Фарҳод Алимов аввалига иқтисодчи бўлган, кейин эса ўз касбини алмаштирган.

«Мен 1998 йилда Тошкент давлат аграр университетининг иқтисодиёт факультетини тамомлаганман. Ўз соҳамда банкнинг кредит бўлимида роппа-роса бир йил ишладим. Шундан сўнг бу соҳа мен учун эмаслигини англаб етдим ва касбимни ўзгартирдим. Рақамларни ёқтирмайман, менга мусиқа, шоу-бизнес олами ёқади».

Суҳбат давомида ўзининг биринчи турмуш ўртоғи билан ажрашган Фарҳод Алимов икки инсон ўртасида муҳаббат бўлиши кераклиги ҳақида айтди:

«Оила мустаҳкам бўлиши тўйнинг қандай ўтишига боғлиқмас. Дабдабали тўй бахт гарови эмас. Турмуш қуришдан аввал сиз бир-бирингизни севишингизни аниқлаб олишингиз керак. Шундан сўнггина тўйга тараддуд кўриш мумкин. Баъзан ҳаётда шундай бўладики, шошилинчда турмуш қуришади, тўй қилишади. Орадан бир йил ўтгач эса, бир-бирига тўғри келмаслигини тушуниб етади. Шунча тайёргарлик, ташвишлар нимага керак эди? Шунинг учун ҳаммаси икки инсоннинг ўзига боғлиқ. Мен икки инсон ўртасида муҳаббат бўлиши керак, деб ҳисоблайман».