Ҳурматли аёллар, ҳужжатлар учун қандай қилиб чиройли суратга тушиш мумкинлигини биласизми?

Паспорт учун суратга тушиш — кўпчилик аёллар учун даҳшатнинг ўзгинаси. 3×4 сантиметрли суратга тушишда қулай нуқтани эгаллай олмайсиз, PhotoShop ҳам иш бермайди. Шунга қарамасдан, ҳужжатлар учун муваффақиятли суратга тушиш шарт-шароитларини яратиш унчалик қийин иш эмас.

Биринчи қадам

Юзнинг соғлом ранги — муваффақиятли сурат гаровидир. Суратга тушишдан бир кун аввал юзни пилинг қилиб, ниқоблардан фойдаланиш ва тўйиб ухлашни тавсия этамиз. Суратхонага боришдан олдин эса пардозости воситаси ёрдамида ҳар қандай қизариш, қора доиралар ва бошқа нуқсонларни бекитиш керак бўлади.

Иккинчи қадам

Сурат юзнинг ўзига хослигини «ювиб кетмаслиги» учун юз релефини яратиш керак. Табиий оч жигаррангли тен ёки ёғупа ёрдамида бурун, пешона ва ияк, шунингдек, ёноқлар соҳасини енгил ажратамиз. Асосийси — меъёрни билиш. Натижа сизга маъқул келгандан сўнг, енгил упа суринг. У макияжнинг сақланиб туришини таъминлаб, ёғли ялтирашнинг олдини олади.

Учинчи қадам

Кўзларга урғу берамиз. Паспорт учун тушилган суратда барчаси оддий ва дид билан бўлиши лозим. Энг яхши вариант — кўзнинг ташқи бурчагига тортилган чизиқ (классик стрелка) ва киприкларни узайтирувчи туш.

Тўртинчи қадам

Лабларни ажратиб кўрсатамиз. Бунда ёрқин ранглар, лаб бўёғи ҳамда қаламнинг кескин фарқ қилишидан воз кечишни тавсия этамиз. Табиий, кўзга ташланмайдиган рангдаги лаб бўёғи идеал вариант бўла олади. Қалам ранги лаб бўёғи рангига уйғун бўлиши ва лабларнинг табиий шаклини ҳосил қилиши лозим.

Бешинчи қадам

Суратга тушиш вақтида сочлар тоза, ярқироқ ва парвариш қилинган бўлиши лозим. Мураккаб соч турмакларини танлашни тавсия этмаймиз. Барчасини ўз ҳолича қолдирган маъқул, зеро табиийлик ҳеч қачон урфдан қолмайди.

Шунингдек, суратга тушишдан аввал ойна олдида машқ қилиш керак: табассум ҳам бир санъат. Тажриба қилиб кўринг. Юзингиздаги қай бир ифода ўзингизга маъқул келишини аниқлаб, уни ёдда сақланг ва суратга тушишда шу ифодадан фойдаланинг.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.