Жанубий Корея КХДР дронларини электромагнит импульслари ёрдамида ишдан чиқарадиган қурол ишлаб чиқмоқда. Бу ҳақда 27 ноябрь куни «Рёнхап» агентлиги маълум қилди, деб хабар беради «Корреспондент.net».
Жанубий Корея мудофаани ривожлантириш агентлиги (ADD) ҳарбийлар қўлида мавжуд электромагнит импульслари генераторидан фойдаланиш йўлларини қидирмоқда. Ушбу генератор кичик дронларга қарши курашга мўлжалланган. Ядровий заряд ишлаб кетганида электромагнит импульслари ажралиб, улар электромагнит майдонларини бузиб юборади ҳамда кўпчилик электр ускуналарни, шу жумладан, дронларни ишдан чиқаради.
Шунингдек, ADD миллий мудофаа саноати вакиллари билан биргаликда GPS сигналини ўчириш технологиялари устида ишлашни режалаштирмоқда. Бундан ташқари, дронларни зарарсизлантириш учун кичик ракеталар яратилади.