Туркия ҳарбийлари Сурия шимолида Курдистон ишчи партиясининг 7 нафар жангчисини йўқ қилди

Туркия қуролли кучлари 4 май куни Сурия шимолида Курдистон ишчи партиясига алоқадор 7 нафар жангарини йўқ қилган. Бу ҳақда Anadolu нашри хабар берди.

Манбада айтилишича, 7 нафар ташкилот аъзоси махсус операция натижасида йўқ қилинган. Аксилтеррор операция қуруқлик қўшинлари томонидан амалга оширилган.

Туркия Миллий мудофаа вазирлиги хабарига кўра, жангарилар Сурия шимолидаги “Тинчлик булоғи” ва “Фурот қалқони” махсус операция зоналарида терактлар уюштиришни режа қилган. Турк разведкаси уларнинг ҳаракати ҳақида олдиндан маълумот тўплашга эришган.

Anadolu нашри ҳалок бўлганларнинг барчаси Курдистон ишчи партиясига алоқадор эканини ёзган. Аммо бир қанча Яқин Шарқ нашрлари жангарилар Суриядаги “Халқ мудофаа бўлинмалари” гуруҳига алоқадор эканлигини билдирган. Бу икки ташкилот асосан этник курдлардан иборат бўлиб, ҳамкорликда ишлаши айтилган.

Маълумот ўрнида, Курдистон ишчи партияси расман Туркия, АҚШ ҳамда Европа Иттифоқида террорчи ташкилот деб эълон қилинган. 40 йиллик террор кампанияси давомида партия 40 000 дан ортиқ одам, жумладан, аёллар, болалар ва гўдаклар ўлимига сабабчи бўлган.

2016 йилда Анқара ҳукумати Сурия шимолида террорчилар коридорининг шаклланишига йўл қўймаслик ва аҳолининг ўз турар жойларига тинч йўл билан қайтишини таъминлаш мақсадида чегара ҳудуди бўйлаб аксилтеррор операцияларини бошлади. “Фурот қалқони” (2016), “Зайтун новдаси” (2018) ва “Тинчлик баҳор” (2019) операциялари ҳозирга қадар давом эттирилмоқда.