Россия президенти Владимир Путин Францияда ўнг марказчилар праймеризи биринчи босқичида ғолиб чиққан Франсуа Фийонни кескин музокарачи ва ҳалол одам сифатида таърифлади, деб ёзади «Интерфакс».
«Жаноб Фийонга келадиган бўлсак, у Франция ҳукуматини бошқарган, мен эса ҳукумат раиси бўлган вақтимда, биз Франсуа билан бирга ишлаганмиз… Бизда шахсий, жуда қалин алоқалар юзага келганди», — деди Путин журналистларга берган интервьюсида.
«Айтишим керакки, жаноб Фийон, фикримча, дунёдаги бошқа сиёсатчилардан кескин фарқ қилади, чунки у бир қарашда ёпиқ одам. Аммо унинг европача хулқи туфайли, у доим ўз нуқтаи назарини қатъий тарзда ёқлай олади, шу маънода у кескин музокарачи. Бироқ шуниси аниқки, у олий даражада профессионал ва ҳалол одам», — дея таъкидлади Путин.
Эслатиб ўтамиз, аввалроқ Франция собиқ президенти Николя Саркози ўнг марказчилар праймеризидаги мағлубиятини тан олган эди. Овозлар ҳисоб-китобига кўра, 10 229 участкадан 8 400 тасида Саркози 22,1 фоиз овоз тўплади, бу эса унга иккинчи босқичга ўтиш имконини бермади. Унинг рақиблари мамлакатнинг собиқ бош вазири (2007—2012) Франсуа Фийон 44,0 фоиз, собиқ бош вазир (1995—1997) Ален Жюппе эса 28,1 фоиз овоз тўплаган.
Изоҳ (0)