Дональд Трампнинг куёви — 35 ёшли Жаред Кушнер Республикачилар партияси номзодининг АҚШдаги президентлик сайловида ғалаба қозонишида улкан, ҳатто ҳал қилувчи роль ўйнади. «Қандай қилиб Жаред Трамп учун Оқ Уйни ишғол қилди» сарлавҳаси остида материал чоп этган Forbes журнали шундай хулосага келди, деб хабар беради «ТАСС».
Материал Кушнернинг қайнотаси сайловолди кампанияси ҳақидаги интервьюси, шунингдек, унинг атрофидаги кишилар, жумладан, турмуш ўртоғи ва сайланган президентнинг қизи Иванка Трамп, АҚШ собиқ давлат котиби Генри Киссинжер, бизнес-магнатлар Эрик Шмидт (Alphabet ва Google), Питер Тиль (PayPal), Руперт Мёрдок (News Corp) билан суҳбатларга асосланган.
Мёрдокнинг билдиришича, «яқин тўрт-саккиз йил ичида Кушнер Оқ Уйда катта таъсирга, балки ҳатто вице-президентдан кейинги нуфузга эга бўлади».
«Жаред ижтимоий тармоқлар дунёсини анъанавий ОАВдан кўра яхшироқ тушунарди. У президентлик кампаниясини минимал даражадаги харажатлар ва замонавий технологиялар эвазига ташкил этиш ҳамда ғалаба қозонишнинг уддасидан чиқди. Бу катта иш. Эслайсизми, ҳамма уларнинг маблағи, одамлари, тизими йўқ деб айюҳаннос солганди? Бироқ улар ютди ва бу муваффақиятга Жаред етаклади», — таъкидлади Эрик Шмидт.
Forbes’га кўра, Трампнинг шакллантирилаётган маъмурияти президентнинг куёви Оқ Уйда расмий лавозимни эгаллаши учун мавжуд қонунлардан йўл қидирмоқда. Бунга Жон Кеннеди укаси Робертни адлия вазири этиб тайинлаганидан сўнг қариндош-уруғчиликка қарши кураш учун ўрнатилган ҳуқуқий чекловлар халақит беради. Лекин, нима бўлганда ҳам, журнал изоҳ берганидек, «ҳеч қандай қонун президентга ўзи истаган одам билан маслаҳатлашишга халақит бермайди».
Изоҳ (0)