АҚШ ҳукумати ИШИД террорчилик ташкилотининг уч нафар бошлиғига қарши санкциялар киритди, дея хабар бермоқда «Корреспондент.net» Давлат департаменти сайтига таяниб.
Санкция рўйхатига Абдулла Аҳмад ал-Машадоний, Басил Ҳасан ва Абделил Ҳимич кирди.
Давлат департаменти қайд этишича, Абдулла Аҳмад ал-Машадоний чет эллик жангарилар, шу жумладан, худкушларни ИШИД сафларига жўнатиш ва жойлаштириш билан шуғулланади. Дастлабки маълумотларга кўра, у шунингдек, ИШИД бошлиғи Абу Бакр ал-Бағдодийнинг маслаҳатчиси ҳамдир.
Басил Ҳасан 2013 йилда даниялик журналистни қатл қилганликда айбланмоқда. 2014 йилда террорчи Туркияда қўлга олинган, аммо кейинроқ уни ИШИД қўлидаги 49 нафар асирга айирбошлашган эди.
Абделил Ҳимич эса ИШИДнинг «ташқи операциялари»ни бошқаради. У 2015 йилда Европада «Тариқ ибн Зиёд» террорчилик тармоғини яратган эди. У 2015 йил ноябрида Парижда, шу йил мартида эса Брюсселда бўлиб ўтган терактларга алоқадор бўлиши мумкин.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)