АҚШ президенти лавозимини тарк этаётган Барак Обама ва унинг ўрнини эгаллайдиган Дональд Трамп 10 ноябрь куни Оқ уйда бўлиб ўтган учрашувдан кейин телефон орқали суҳбатлашган. Бу ҳақда Оқ уй матбуот котиби Жошуа Эрнест журналистлар учун брифингда маълум қилди, деб ёзади «ТАСС».
У Америка матбуотида Трамп ва Обаманинг янги мулоқоти ҳақида пайдо бўлган маълумотларни изоҳлади. Бу ҳақда 21 ноябрь, душанба куни АҚШнинг янги етакчиси «матбуот учун эмас» режимида қатор миллий ОАВлар раҳбарлари билан учрашгач, маълум бўлган эди.
«Президент Обама ҳукуматнинг силлиқ тарзда топширилишини таъминлаш бўйича мажбуриятни ўз зиммасига олди, улар (Трамп билан) Овал кабинетдаги учрашувдан сўнг камида бир марта суҳбатлашди», — деди Эрнест.
У ушбу суҳбат мазмунини ва у айнан қачон бўлиб ўтганини ошкор қилмади. Шу билан бирга, у Обама ҳукумат ваколатларининг Трамп раҳбарлигидаги янги маъмуриятга «силлиқ ва самарали тарзда топширилишини» таъминлаш истагига бир неча марта ишора қилганини таъкидлади.
Изоҳ (0)