Актриса Дилноза Кубаева «Даракчи» нашри билан суҳбатда режиссёр Рустам Саъдиев томонидан суратга олинаётган «Эр бермоқ — жон бермоқ 2» фильми ҳақида фикр билдирди.
«Театрдан таътилимнинг асосий қисми «Эр бермоқ — жон бермоқ 2» фильмининг съёмка ишлари билан ўтди, десам ҳам бўлади. Мени қувонтиргани, бу сафар кино иши театрдаги фаолиятимга халал бермади», — деб сўз бошлади Кубаева.
Журналист Дилдора Юсуфбекованинг партнёрингиз бу сафар нега Улуғбек Қодиров эмас, деб берган саволига актриса шундай жавоб қайтарди:
«Шу саволни беришингизни билгандим (кулади). Фильмнинг иккинчи қисми биринчисининг мантиқий давоми эмас. Картинада тамоман бошқа тақдирлар акс этган. Съёмка бошланмасидан олдин ‘Нега Улуғбек ўйнамаяпти?’ деб, партнёрим учун тортишдим ҳам. Рустам Саъдиев ‘Аввал сценарийни ўқиб чиқинғ деганида ҳам, барибир, норозилигим бор эди. Лекин суратга олиш ишлари бошлангач билдимки, ҳақиқатан ҳам бу рол Адиз Ражабовники экан».
Партнёрларнинг алмашиши яққол сезилиши борасидаги саволга Кубаеванинг жавоби:
«Бу ҳолатни ҳаммадан олдин мухлислар сезишади. Ҳозирдан ‘Улуғбек Қодиров билан бирга суратга тушдингизми?’ деган саволлар бўлаяпти. Умуман, картинанинг давоми ишланаётганда аввалига янги партнёрни қабул қилишга қийналасиз, аммо съёмка майдончасида режиссёр тўғри танлов қилибди, деб иқрорингиз ўзгаради. Адиз профессионал актёр, тасвирга олиш жараёнида жуда яхши ишладик».
Дилноза Куабаева Адиз Ражабов билан бунга қадар «Фарзандим», «Бахт уйи» картиналарида бирга ишлагани ҳақида айтиб ўтган. Унинг фикрича, тандемда бир-бирларини тўлдира олади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)