Aktrisa Dilnoza Kubayeva “Darakchi” nashri bilan suhbatda rejissor Rustam Sa’diyev tomonidan suratga olinayotgan “Er bermoq — jon bermoq 2” filmi haqida fikr bildirdi.
“Teatrdan ta’tilimning asosiy qismi “Er bermoq — jon bermoq 2” filmining syomka ishlari bilan o‘tdi, desam ham bo‘ladi. Meni quvontirgani, bu safar kino ishi teatrdagi faoliyatimga xalal bermadi”, — deb so‘z boshladi Kubayeva.
Jurnalist Dildora Yusufbekovaning partnyoringiz bu safar nega Ulug‘bek Qodirov emas, deb bergan savoliga aktrisa shunday javob qaytardi:
“Shu savolni berishingizni bilgandim (kuladi). Filmning ikkinchi qismi birinchisining mantiqiy davomi emas. Kartinada tamoman boshqa taqdirlar aks etgan. Syomka boshlanmasidan oldin ‘Nega Ulug‘bek o‘ynamayapti?’ deb, partnyorim uchun tortishdim ham. Rustam Sa’diyev ‘Avval ssenariyni o‘qib chiqing’ deganida ham, baribir, noroziligim bor edi. Lekin suratga olish ishlari boshlangach bildimki, haqiqatan ham bu rol Adiz Rajabovniki ekan”.
Partnyorlarning almashishi yaqqol sezilishi borasidagi savolga Kubayevaning javobi:
“Bu holatni hammadan oldin muxlislar sezishadi. Hozirdan ‘Ulug‘bek Qodirov bilan birga suratga tushdingizmi?’ degan savollar bo‘layapti. Umuman, kartinaning davomi ishlanayotganda avvaliga yangi partnyorni qabul qilishga qiynalasiz, ammo syomka maydonchasida rejissor to‘g‘ri tanlov qilibdi, deb iqroringiz o‘zgaradi. Adiz professional aktyor, tasvirga olish jarayonida juda yaxshi ishladik”.
Dilnoza Kuabayeva Adiz Rajabov bilan bunga qadar “Farzandim”, “Baxt uyi” kartinalarida birga ishlagani haqida aytib o‘tgan. Uning fikricha, tandemda bir-birlarini to‘ldira oladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)