Хавфсизлик бўйича эксперт Сэми Камкар ҳар қандай компьютерга бузиб кира оладиган қурилмани яратди, деб ёзади «Hi-tech.mail.ru». PoisonTap’ни йиғиш атиги 5 долларга тушди, унинг тавсифини Камкар ўз сайтида эълон қилди.
PoisonTap’нинг асосини Raspberry Pi Zero митти компьютери ташкил қилади. Уни бошқа USB-гаджетлар, хусусан, USB Armory ёки LAN Turtle’га тақлид қила оладиган бошқа қурилмалар билан алмаштириш мумкин.
Шунингдек, microSD картаси ва миcроUSB — USB кабели зарур бўлади. Бузиб кириш учун дастурий таъминотни GitHub сайтидан бепул юклаб олиш мумкин.
Блокланган компьютерга бузиб кириш учун, PoisonTap’ни унинг USB-портига улаш керак. Компьютерни блокировкадан чиқариш автоматик тарзда амалга ошади ва бир неча сония вақт олади. Камкар ушбу жараённи видеога олиб, YouTube’га жойлади.
PoisonTap ўзини USB Ethernet адаптер деб кўрсатади, уни тизим бирламчи қурилма деб ҳисоблайди. У компьютер блокланган тақдирда ҳам, автоматик тарзда таниб олинади ва дастурий таъминот бутун трафикни ўзига қайта йўналтиради.
Зараркунанда гаджет браузернинг cookies қайдларини қўлга киритиши, миллионлаб яширин файлларни очиши, Gmail, Facebook, шунингдек, онлайн-банкинг каби оммабоп сервисларнинг зараркунанда версияларини яратиши мумкин.
Бундан ташқари, PoisonTap ҳужум қилинган компьютер уланган маршрутизаторга ҳужум қилади. Унга бэкдор ўрнатилади ва роутерга интернетдан кириш мумкин бўлади. Шунинг ҳисобига шифрланмаган трафикни тутиш ва ўзгартириш мумкин.
Изоҳ (0)