Fitch Ўзбекистондаги тўртта банк рейтингларини «B+»гача оширди

Fitch Ratings рейтинг агентлиги Ўзбекистоннинг давлат назорати остидаги тўртта банкининг хорижий валютадаги узоқ муддатли эмитент дефолти рейтингини «B» даражадан «B+» даражагача кўтарди, дея хабар бермоқда UzDaily. Булар «Ўзсаноатқурилишбанк», «Асака», «Агробанк» ва «Микрокредитбанк»дир.

Суверен кредит қобилиятининг Fitch агентлиги томонидан ижобий қайта баҳоланиши Ўзбекистон иқтисодиётининг минтақадаги тушкунликка нисбатан барқарорлигини ҳамда ҳукумат алмашишининг силлиқ кечишидан сўнг сиёсий рискларнинг мўътадил пасайишини акс эттиради, дейилади хабарда.

Ушбу тўртта банкнинг эмитент дефолти рейтинглари, қўллаб-қувватлаш рейтинглари ва узоқ муддатли эмитент дефолти рейтингларини қўллаб-қувватлаш даражаси ҳамон Ўзбекистон ҳукуматидан кўмак олиш салоҳияти орқали мустаҳкамланмоқда.

«Ўзсаноатқурилишбанк», «Асака», «Агробанк» ва «Микрокредитбанк»нинг эмитент дефолти рейтинглари суверен кредит қобилиятининг мустаҳкамланиши ёки заифлашиши натижасида ўзгариши мумкин. Банкларнинг назорат қилувчи акциядори ўзгарса, уларнинг рейтинги пасайишига олиб келиши мумкин.