Австрия полицияси Каринтия федерал еридаги молиявий муассасалардан бирининг банкоматидан 700 минг евро ўғирланиши билан боғлиқ воқеани тафтиш қилмоқда. Терговчиларнинг фикрича, банк хизматчиларидан бири йил давомида ўз бўлимидаги ускуна хавфсизлик тизимини алдаб, ундан пул ўғирлаган, деб хабар бермоқда «ТАСС».
Полиция терговчилари қаллоблик схемасини фош қилиш анча вақт талаб қилишини тан олмоқда. Ҳозирда маълум бўлишича, қаллоб банкомат пул кассеталарини тўлдириш чоғида ҳақиқий купюраларни картон бўлаклари билан алмаштириб қўйган ва улар ёрдамида етишмаётган ҳажмни тўлдирган. Пулни нақдлаштириш операцияси чоғида банкомат мижозларга ҳар доим ҳақиқий пул чиқариб берган, навбат картон бўлакларига келганида эса ускуна маблағ етишмаётгани ҳақида сигнал берган.
Шунингдек, эркак инкассация учун қопларни бериб юборишда йирик номиналли купюраларни майда номиналлиларига алмаштириб қўйган.
Бир йил давомида банкнинг бошқа ходимлари ушбу қаллоблик тизимини сезмаган. Ўз навбатида, фирибгар шу йўл билан топган пулларини казинода совурган.
Йирик пул етишмовчилиги аниқланганидан сўнг молиявий муассасада ички текширув ўтказилиб, фирибгарлик фош этилди. Номи келтирилмаётган эркак айбини тан олди ва ҳозир тергов остида. Ўз хатти-ҳаракатларини тушунтирар экан, эркак 2014 йилда банкдаги талончилик чоғида жисмоний ва руҳий жароҳат олганини айтди. Ўшанда талончи газли тўппончадан унинг пешонасига отган эди.
Изоҳ (0)