Тошкентдаги Халқаро мева-сабзавот ярмаркаси доирасида хорижлик меҳмонлар, олимлар ва мутахассислар учун пойтахт ҳамда Тошкент вилоятидаги бир қатор саноат корхоналарига саёҳат уюштирилди. Бу ҳақда ЎзА хабар бермоқда.
Тошкент вилоятининг Юқори Чирчиқ туманида жойлашган Marwin brends масъулияти чекланган жамияти 2007 йилда фаолият бошлаган. Замонавий технологиялар билан жиҳозланган корхонада 200 га яқин ходим меҳнат қилади. Кимёвий, биокимёвий, бактериологик текширувларни жаҳон андозалари даражасида ташкил этиш учун замонавий шароитлар яратилган. Ана шундай синов босқичларидан ўтиб истеъмолчига тақдим этилаётган Dena савдо белгиси остидаги шарбатлар табиийлиги, хуштаъмлиги билан харидорларга манзур бўлмоқда. Хорижлик меҳмонлар уларнинг сифатига юқори баҳо берди.
Юқори Чирчиқ туманида жойлашган Asian jam корхонасининг Sempre савдо белгиси остидаги мураббо ва шарбатлари ҳам барчага манзур бўлди. Корхонада 20 турга яқин маҳсулот ишлаб чиқарилмоқда. Сиғими қарийб 3 минг тонналик замонавий технологиялар билан жиҳозланган омборда меваларни табиий ҳолда сақлаш имконияти мавжуд. Ушбу маҳсулотлар заводда қайта ишланиб, хилма-хил мурабболар тайёрланади.
Пойтахтнинг Бектемир туманида жойлашган GDF export корхонасидаги замонавий шароитлар ҳам тадбир қатнашчиларида катта таассурот қолдирди. Ушбу корхонанинг Тошкент, Сурхондарё, Наманган вилоятларидаги икки минг гектарга яқин экин майдонида экологик соф мева-сабзавот етиштирилади. Тошкентдаги заводда мевалар қайта ишланади.
— Ўзбекистоннинг табиий иқлим шароити мазали, табиий, экологик соф, шифобахш мева-сабзавотларни етиштириш учун жуда қулай, — дейди Жанубий Кореянинг Чунгнам миллий университети профессори Жонг Ёнг Пёнг. — Бозорларингиздаги тўкинлик кўзни қувонтиради, арзончилик ҳавасни келтиради. Ярмарка бу борадаги мамлакат салоҳиятини кенг намойиш этиш, ишлаб чиқаришни ривожлантириш, қишлоқ хўжалиги бўйича халқаро алоқаларни кенгайтиришда муҳим аҳамият касб этади.
Изоҳ (0)