Toshkentdagi Xalqaro meva-sabzavot yarmarkasi doirasida xorijlik mehmonlar, olimlar va mutaxassislar uchun poytaxt hamda Toshkent viloyatidagi bir qator sanoat korxonalariga sayohat uyushtirildi. Bu haqda O‘zA xabar bermoqda.
Toshkent viloyatining Yuqori Chirchiq tumanida joylashgan Marwin brends mas’uliyati cheklangan jamiyati 2007-yilda faoliyat boshlagan. Zamonaviy texnologiyalar bilan jihozlangan korxonada 200 ga yaqin xodim mehnat qiladi. Kimyoviy, biokimyoviy, bakteriologik tekshiruvlarni jahon andozalari darajasida tashkil etish uchun zamonaviy sharoitlar yaratilgan. Ana shunday sinov bosqichlaridan o‘tib iste’molchiga taqdim etilayotgan Dena savdo belgisi ostidagi sharbatlar tabiiyligi, xushta’mligi bilan xaridorlarga manzur bo‘lmoqda. Xorijlik mehmonlar ularning sifatiga yuqori baho berdi.
Yuqori Chirchiq tumanida joylashgan Asian jam korxonasining Sempre savdo belgisi ostidagi murabbo va sharbatlari ham barchaga manzur bo‘ldi. Korxonada 20 turga yaqin mahsulot ishlab chiqarilmoqda. Sig‘imi qariyb 3 ming tonnalik zamonaviy texnologiyalar bilan jihozlangan omborda mevalarni tabiiy holda saqlash imkoniyati mavjud. Ushbu mahsulotlar zavodda qayta ishlanib, xilma-xil murabbolar tayyorlanadi.
Poytaxtning Bektemir tumanida joylashgan GDF export korxonasidagi zamonaviy sharoitlar ham tadbir qatnashchilarida katta taassurot qoldirdi. Ushbu korxonaning Toshkent, Surxondaryo, Namangan viloyatlaridagi ikki ming gektarga yaqin ekin maydonida ekologik sof meva-sabzavot yetishtiriladi. Toshkentdagi zavodda mevalar qayta ishlanadi.
— O‘zbekistonning tabiiy iqlim sharoiti mazali, tabiiy, ekologik sof, shifobaxsh meva-sabzavotlarni yetishtirish uchun juda qulay, — deydi Janubiy Koreyaning Chungnam milliy universiteti professori Jong Yong Pyong. — Bozorlaringizdagi to‘kinlik ko‘zni quvontiradi, arzonchilik havasni keltiradi. Yarmarka bu boradagi mamlakat salohiyatini keng namoyish etish, ishlab chiqarishni rivojlantirish, qishloq xo‘jaligi bo‘yicha xalqaro aloqalarni kengaytirishda muhim ahamiyat kasb etadi.
Izoh (0)