Ўзбекистон «Адолат» социал-демократик партиясидан Ўзбекистон Республикаси Президентлигига номзод Наримон Умаров 5 ноябрь, шанба куни Андижон вилояти сайловчилари билан учрашди. Вилоятнинг барча туман ва шаҳарлари сайловчилари билан видеоконференция орқали мулоқот тарзида ташкил этилган тадбирда жами 3000 нафарга яқин талаба-ёшлар, жамоат ташкилотлари вакиллари, фуқароларнинг ўзини ўзи бошқариш органлари фаоллари, маҳаллий кенгашлар депутатлари, партиянинг вилоят, туман ва шаҳар кенгашлари аъзолари қатнашди. Бу ҳақда партия матбуот хизмати хабар бермоқда.
Учрашувни Ўзбекистон «Адолат» СДП Андижон вилоят Кенгаши раиси П. Асханов олиб борди. Президентликка номзод Н. Умаровнинг ишончли вакили, Ўзбекистон «Адолат» СДП Андижон вилоят Кенгаши матбуот котиби А. Назаров йиғилганларга Ўзбекистон Республикаси Президентлигига номзоднинг таржимаи ҳоли ҳақида батафсил маълумот берди.
Наримон Умаров учрашув иштирокчиларига ўз сайловолди дастурининг асосий йўналишларини маълум қилди. Хусусан, номзод демократик ижтимоий давлат ва адолатли фуқаролик жамиятини қуриш, қонун устуворлигига эришиш, макроиқтисодий барқарорликни янада мустаҳамлаш, фуқароларнинг ижтимоий ҳимоясини янада кучайтириш ва бу борадаги ишлар самарадорлигини ошириш, мамлакатни модернизация қилишдек устувор вазифалардан келиб чиққан ҳолда, янги авлод кадрларини тайёрлаш, миллий манфаатлар устувор бўлган ташқи сиёсатни олиб боришга доир масалаларда ўз қарашлари билан ўртоқлашди.
Номзод сайловчилар эътиборини Андижон вилояти республиканинг майдони энг кичик ва аҳоли зич яшайдиган ҳудуди эканлигига қаратар экан, вилоятда бугунги кунда 2,9 миллиондан ортиқ киши истиқомат қилаётгани ҳамда шундай шароитда вилоят аҳолисининг уй-жойга бўлган талаб ва эҳтиёжи юқорилиги ҳақида тўхталди.
Н. Умаров мамлакат аҳолиси сони кўпайиб, уларнинг турмуш сифати ва даражаси юксалиб бораётганидан келиб чиқиб, фуқароларнинг уй-жойга бўлган талабини қондиришнинг мақбул йўлларини таклиф этди. Уй-жой сотиб олиш ва қуриш учун ажратилаётган ипотека кредитлаш жараёнини такомиллаштириш ва фоизларини оптималлаштириш, уй-жой бозоридаги фирибгарликлар учун жавобгарликни ва назоратни кучайтириш, уй-жой-коммунал комплекси ишини янада яхшилаш, аҳоли учун белгиланаётган коммунал тўловлар миқдорини доимий назоратда тутиш, бу соҳаларда аҳолига хизмат кўрсатадиган муқобил ташкилотлар ўртасидаги рақобатни оширишга қаратилган саъй-ҳаракатларни амалга ошириш устувор мақсадларидан бири эканлигини маълум қилди.
Очиқ ва жонли мулоқот руҳида ўтган учрашувда иштирокчилар Президентликка номзодга ўзларини қизиқтирган саволлар билан мурожаат этди ҳамда ҳудудларни ижтимоий-иқтисодий ривожлантириш бўйича ўз фикр ва таклифларини билдирди.
Андижон вилоят халқ депутатлари вилоят Кенгаши депутати З. Комилова, Асака туман тиббиёт бирлашмаси кўп тармоқли марказий поликлиника шифокори А. Султонов, «АСР Фаровонлик сари» масъулияти чекланган жамияти раҳбари Б. Комилов, Ўзбекистон «Адолат» СДП Асака туман кенгаши раиси М. Каримова ва бошқалар Наримон Умаровнинг сайловолди дастурини қўллаб-қувватлаб сўзга чиқди ҳамда сайловчиларни 4 декабрь куни бўлиб ўтадиган муҳим сиёсий тадбирда фаол иштирок этишга чақирди.
Изоҳ (0)