Бразилиялик афсонавий футболчи Карлос Альберто Торрес 72 ёшида вафот этди

Бразилияда футбол бўйича мамлакат терма жамоаси собиқ аъзоси, барча даврларнинг энг яхши ҳимоячилардан бири Карлос Альберто Торрес 72 ёшида оламдан ўтди. Бу ҳақда «Интерфакс» хабар бермоқда.

ФИФА матбуот хизматининг маълум қилишича, афсонавий футболчи юрак хуружидан вафот этди.

Карлос Альберто 1970 йили Бразилия термаси сафида жаҳон чемпиони бўлганди. Финал баҳсида Бразилия 4:1 ҳисобида Италияни мағлубиятга учратган, голлардан бирига эса айнан Карлос Альберто муаллифлик қилган эди.

Маълумот учун, Карлос Альберто «Нью-Йорк Космос» клуби билан 4 карра АҚШ чемпиони бўлган. Футболчилик фаолиятидан сўнг у мураббий ва шарҳловчи бўлиб ишлаган.