ХОҚ Пхенчхан–2018 ташкилотчиларидан чипталар қаллоблигида гумонланаётган THG компанияси хизматларидан воз кечишни сўради

Халқаро олимпия қўмитаси (ХОҚ) раҳбари Томас Бах Жанубий Кореяда бўлиб ўтадиган Пхенчхан–2018 қишки Олимпия ўйинлари ташкилий қўмитасидан Рио–2016 ёзги Олимпия ўйинларида чипталарни ноқонуний равишда тарқатган THG компанияси хизматларидан фойдаланмасликни сўради. Томас Бахнинг мурожаат хати матнини Inside the Games портали чоп этди, деб хабар бермоқда «ТАСС».

THG компанияси Ирландия учун Рио–2016 ўйинларида чипталарни расмий тарқатувчи бўлган. Риодаги Олимпиадада шаҳар полицияси компания вакили Кевин Мэллонни Олимпиаданинг энг машҳур тадбирлари учун мўлжалланган 800 та чипта билан қўлга олди. Гувоҳларнинг берган кўрсатмасига кўра, улардан бир нечтаси Олимпиада очилиш маросимига кириш учун Мэллон ва унинг шерикларига 8 минг доллардан тўлаган. Ушбу чипталарнинг расмий нархи эса 450 доллар бўлган.

«ХОҚ Пхенчхан–2018 ташкилий қўмитасидан THG компаниясини Ирландия учун расмий тарқатувчи бўлиш жараёнини тўхтатиб туришни сўради», – дейилади Бахнинг хатида.