Ўзбекистон миллий кутубхонасида 6 сентябрь куни Ўзбекистон халқ ёзувчиси Ўткир Ҳошимовнинг 75 йиллигига, 7 сентябрь куни эса Ўзбекистон халқ артисти Ўлмас Алихўжаевнинг 75 йиллигига бағишланган хотира кечалари бўлиб ўтди. Бу ҳақда кутубхона матбуот хизмати хабар бермоқда.
Ўзбекистон халқ ёзувчисига бағишланган хотира кечасида филология фанлари доктори, профессор Иброҳим Ғофуров Ўткир Ҳошимовнинг асарларида зиёлилар муаммоларининг ёритилиши, «Баҳор қайтмайди», «Дунёнинг ишлари», «Нур борки, соя бор», «Икки эшик ораси» каби асарларининг яратилиш тарихи ҳақида сўзлаб берди.
Ўзбекистон Ёзувчилар уюшмаси аъзоси, адабиётшунос Хуршид Дўстмуҳаммад Ўткир Ҳошимовнинг камтарлик, ёрдамга тайёрлик ва очиқлик каби инсоний хислатлари ҳақида ҳикоя қилди. Ўзбекистон халқ артисти Лутфулла Саъдуллаев адиб билан ижодий ҳамкорлиги ҳақида хотирлади ва фильмларни суратга олиш майдонларида бўлиб ўтган қизиқарли воқеалар ҳақида сўзлаб берди.
Ўзбекистон халқ артисти Гулчеҳра Саъдуллаева эса Ўткир Ҳошимов асарларини севиб мутолаа қилишини, унинг асарлари ҳаётда инсонларга сабоқ бўлишини, уларда кўпгина турмуш муаммоларига ечим топилишини айтди ва китобхонларга уларни мутолаа қилишини тавсия этди. Ҳошимовлар оиласи вакиллари эса Ўткир Ҳошимовнинг оталик, боболик хислатлари ҳақида ҳикоя қилди.
Тадбир доирасида Ўзбекистон халқ ёзувчиси таваллудининг 75 йиллиги муносабати билан «Қалбларни забт этган адиб» деб номланган адабиётларнинг очиқ кўргазмаси бўлиб ўтди.
Ўлмас Алихўжаевга бағишланган хотира тадбирида Ўзбекистон халқ артисти Гулчеҳра Жамилова марҳум актёр билан ҳамкорликда суратга тушган фильмлар, унинг ёш актёрларга берган ўгитлари ва унинг ҳатто машҳурликка эришганда ҳам йўқотмаган инсонийлик хислатлари ҳақида ҳикоя қилди.
Ўзбекистон халқ артисти Гулчеҳра Саъдуллаева ҳам унинг актёрлик ва педагоглик маҳоратини алоҳида таъкидлаб: «Ўлмас ака меҳрибон, содиқ дўст, вафодор ёр эди. Улар ўз фаолиятлари бошидаёқ ўзларига юқори поғонани белгилаб, ҳаётлари давомида шу поғонага муносиб ролларни ижро этишга ҳаракат қилдилар», — деди.
Ўлмас Алихўжаевнинг дўсти ва касбдоши, Ўзбекистон халқ артисти Ражаб Адашев ўз талабалик ва театр гастроллари даврини хотирлаб, деди: «Ўлмас Алихўжаев мендан тўрт курс катта бўлса-да, ҳамиша хушмуомала ва ёрдамга тайёр эди. Таҳсилдан сўнг Ўлмас ака фаолият кўрсатаётган театрга йўлланма олганимда беҳад мамнун бўлганман ва у ўйнаган фильмда кичик роль бўлса ҳам ижро этганимдан хурсанд бўлар эдим».
Тадбирда Ўлмас Алихўжаев бош ролларда ўйнаган кинофильмларидан парчалар қўйилди. «Ижод» залида «Қодирий орзу қилган қаҳрамон» номли китоб-расмли кўргазма очилди. Миллий кутубхона фойесида эса «Ўзбеккино» миллий агентлиги билан санъатшунос Елена Қори-Ёқубова ва Гулнора Худойберганова, таниқли режиссёр Ҳамид Қаҳрамон томонидан тақдим этилган фотосуратлар кўргазмаси бўлиб ўтди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)