Қозоғистон матбуоти: Ўзбекистон сўнгги паллада мамлакатимиздан ўзиб кетди

Рио—2016 Олимпиадасининг сўнгги кунида Ўзбекистон терма жамоаси 2 та олтин ва 2 та бронза медалини қўлга киритиб, жами 4 та олтин, 2 та кумуш ва 7 та бронза билан медаллар рейтингида бир кун аввал эгаллаб турган 31-ўриндан 21-поғонага кўтарилди ҳамда мана шу ўринда турган Қозоғистон термасининг бир ўрин пастлашига сабабчи бўлди.

Қозоғистон матбуоти Ўзбекистон термасининг Олимпия ўйинлари сўнгги кунида Қозоғистон терма жамоасини ортда қолдириб кетганига алоҳида урғу бериб ўтди.

«Рио Олимпиадасининг сўнгги кунида Қозоғистон термаси 22-ўринга пастлади. Сўнгги паллада ҳисобида 13 та медаль, шулардан 4 таси олтин бўлган Ўзбекистон мамлакатимиздан ўзиб кетди. Қозоғистонда 1 та олтин камроқ», – дейилади «Sports.kz» интернет-нашрида.

• Олимпиада. Тарихда илк марта Ўзбекистон дунёда 21, Осиёда 4, МДҲда 2, Марказий Осиёда 1-ўринда

«Ўзбекистон Олимпиаданинг сўнгги кунида 2 та олтин (ва 2 та бронза – «Дарё» изоҳи) медални қўлга киритди. -52 килограмм вазн тоифасида Шаҳобиддин Зоиров ишончли тарзда россиялик Миша Алоянни, -64 килограмм вазн тоифасида эса Фазлиддин Ғоибназаров  келиб чиқиши кубалик бўлган Озарбайжон вакили Лоренцо Сотомайорни мағлубиятга учратиб, Олимпиада чемпиони бўлди. Ўзбекистон учун мана шу муҳим ғалабалар мамлакатнинг медаллар рейтингида ўз ўрнини сезиларли даражада ўзгартиришига замин яратди», – дейилади «Inform.kz» сайтида.

• Ўзбекистон спортчиларнинг Рио Олимпиадасидаги барча медаллари. Битта расмда

Рио–2016 Олимпиадасида 104 нафар спортчи билан иштирок этган Қозоғистон терма жамоаси жами 3 та олтин, 5 та кумуш ҳамда 9 та бронза медалини қўлга киритиб, медаллар рейтингида 22-ўриндан жой олди.

Маълумот учун, Рио–2016 Олимпиадасида 70 нафар спортчи Ўзбекистон шарафини ҳимоя қилди.

• Рио—2016 да совриндор бўлган ўзбекистонлик спортчиларнинг умумий пул мукофоти 1 млн 525 минг АҚШ долларига тенг бўлди