Гренландия қутб акулалари Ер юзидаги энг узоқ умр кўрувчи умуртқали жонзот бўлди. Уларнинг энг каттаси 400 ёшда. Бу ҳақда даниялик олимларнинг Science журналида чоп этилган ҳисоботида маълум қилинди, деб хабар бермоқда «РБК».
Акулаларнинг ёшини аниқлаш учун олимлар уларнинг 28 тасини тадқиқ қилди. Уларнинг аксарияти балиқ овлаш тўрига тушиши билан ҳалок бўлди. Радиоуглерод таҳлили акулалар йилига атиги 1 сантиметрга ўсишини, уларнинг жинсий етуклиги эса 150 ёшида бўлишини аниқлади.
«Аввалига биз ноодатий жониворлар билан иш олиб боряпмиз деб ўйладик, аммо акулаларнинг қарилиги бизни ҳайратга солди», – деди Копенгаген университети биологи Юлий Нильсен.
Бунгача умуртқали жонзотлар орасида энг ёши каттаси Гренландия кити саналган. У 211 ёшда деб ҳисобланган.
Ер юзидаги энг узоқ умр кўрувчи жонзот эса 507 ёшли Мин моллюскаси саналади.
Изоҳ (0)