Эрон 2 йилда нефть соҳасида 25 млрд долларлик шартномалар имзоламоқчи
Кейинги икки йил давомида Эрон чет эл нефть компаниялари билан 25 миллиард доллар қийматдаги шартномаларни имзолашни режалаштирмоқда. Бу ҳақда, Shana агентлигига асосланиб, «Интерфакс» хабар бермоқда.
Эрон миллий нефть компанияси (NIOC) раҳбари Али Кардорнинг сўзларига қараганда, яқин ярим йил-бир йилда бир қанча нефть конлари тендер асосида сотувга қўйилади. Инвестициялар жалб қилишнинг дастлабки босқичи доирасида сотувга қўйиладиган 12–13 кондан иборат рўйхат аллақачон тузилгани айтилмоқда.
Эрон ҳукумати август ойининг бошида чет эл нефть компаниялари билан имзоланажак намунавий шартнома лойиҳасини тасдиқлади. Нефть саноати вазирлиги ҳар бир шартномани индивидуал тартибда кўриб чиқиб, нарх-наво, муддат ва бошқа шартларни синчиклаб ўрганади.
