Eron 2 yilda neft sohasida 25 mlrd dollarlik shartnomalar imzolamoqchi
Keyingi ikki yil davomida Eron chet el neft kompaniyalari bilan 25 milliard dollar qiymatdagi shartnomalarni imzolashni rejalashtirmoqda. Bu haqda, Shana agentligiga asoslanib, “Interfaks” xabar bermoqda.
Eron milliy neft kompaniyasi (NIOC) rahbari Ali Kardorning so‘zlariga qaraganda, yaqin yarim yil-bir yilda bir qancha neft konlari tender asosida sotuvga qo‘yiladi. Investitsiyalar jalb qilishning dastlabki bosqichi doirasida sotuvga qo‘yiladigan 12–13 kondan iborat ro‘yxat allaqachon tuzilgani aytilmoqda.
Eron hukumati avgust oyining boshida chet el neft kompaniyalari bilan imzolanajak namunaviy shartnoma loyihasini tasdiqladi. Neft sanoati vazirligi har bir shartnomani individual tartibda ko‘rib chiqib, narx-navo, muddat va boshqa shartlarni sinchiklab o‘rganadi.
