Ягона интерактив давлат хизматлари порталида бир нечта янги хизмат очилди. Бу ҳақда «Дарё»га портал вакиллари маълум қилди.
Жумладан, «Тошкент шаҳар марказлаштирилган иссиқлик таъминоти тармоғига уланиш учун техник шартлар олишга электрон ариза юбориш» хизмати ташкил этилган бўлиб, у онлайн режимда хонадонга иситиш тизимини ўтказиш юзасидан техник талаблар ҳақида маълумотга эга бўлиш имкониятини беради.
Яна бир хизмат «Товар белгисининг рўйхатдан ўтказилганлиги тўғрисида гувоҳнома олиш»дир. Охирги пайтларда Ўзбекистонда тадбиркорлик билан шуғулланишга иштиёқмандлар сони ошмоқда. Эҳтиёжнинг ортиб бораётганини инобатга олган ҳолда портал товар белгисини онлайн режимда рўйхатдан ўтказишга мўлжалланган хизматни ишга туширди. Фойдаланувчи фақат интернет орқали ариза тўлдириб, тегишли органга йўллаши кифоя. Бир муддатдан сўнг ариза кўриб чиқилиб, фойдаланувчига жавоб берилади ва, рўйхатдан ўтказиш муваффақиятли якунланган тақдирда, гувоҳнома тақдим этилади.
«Болаларни мактабгача тарбия муассасаларига қабул қилиш бўйича аризаларни қабул қилиш» хизмати ёрдамида фойдаланувчилар фарзандларининг болалар боғчасига қатновини расмийлаштириши мумкин. Илгари ушбу хизмат фақат Тошкент шаҳри учун амал қилган бўлса, ҳозирда ундан бутун республика бўйлаб фойдаланиш мумкин. Бунинг учун зарур ҳужжатларни сканердан ўтказиб, электрон нусхаларини шахсий кабинет орқали Ўзбекистон халқ таълими вазирлигига ёки унинг структур бўлинмаларига йўллаш талаб этилади. Бир муддатдан сўнг фойдаланувчига жавоб тариқасида бола учун мактабгача тарбия муассасасига йўлланма тақдим этилади.
Бундан ташқари, Ички ишлар вазирлиги ёнғин автоматикасини, қўриқлаш ва ўт ўчириш сигнализацияларини лойиҳалаштириш, ўрнатиш, лицензиялаш, таъмирлаш ҳамда уларга хизмат кўрсатиш каби ишларни осонлаштириш мақсадида портал билан ҳамкорликда «Ёнғинга қарши автоматика воситаларини, қўриқлаш сигнализацияларини, ёнғиндан дарак берувчи ва ёнғиндан сақловчи сигнализацияларни лойиҳалаштириш, монтаж қилиш, созлаш, таъмирлаш ва уларга техник хизмат кўрсатишни лицензиялаш» хизматини ишга туширди.
Изоҳ (0)