Самарқандда ҳаво ҳароратининг иссиқлиги бўйича 1962 йилги, Термизда эса 1983 йилги рекорд янгиланди

Самарқанд шаҳрида 25 июль, душанба куни ҳаво ҳарорати +39,4 даражагача кўтарилди, дея хабар бермоқда «Ўзгидромет» маркази.

Қайд этишларича, бу Самарқанд шаҳрида 25 июль куни бўйича об-ҳаво кузатувлари тарихидаги энг юқори ҳароратдир.

Шаҳарда бундан аввалги энг иссиқ 25 июль куни 1962 йилда кузатилган бўлиб, ўшанда ҳарорат +37,9 даражагача кўтарилган.

Сурхондарё вилояти маъмурий маркази Термизда ҳам шаҳар тарихидаги энг иссиқ 25 июль қайд этилди.

2016 йилнинг шу куни Термизда ҳаво ҳарорати +44,1 даражагача кўтарилди — 25 июлдаги аввалги рекорд 1983 йилда ўрнатилган бўлиб, ўшанда +43,3 даражага чиққанди.

Маълумот ўрнида, 25 июль куни Тошкент шаҳрида ҳаво ҳарорати +41,1 даражагача кўтарилди. Бу шаҳар тарихидаги энг иссиқ 25 июлда қайд этилган ҳароратдан 0,6 даража пастроқ — 1925 йилнинг 25 июлида Тошкентда ҳаво ҳарорати +41,7 даражагача кўтарилган.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.