Франция мезбонлик қилаётган Евро—2016 финалининг иккинчи иштирокчиси Франция терма жамоаси. 10 июль куни мусобақа мезбони ўз тарихида иккинчи бор ҳал қилувчи ўйинга қадар етиб келган Португалияга қарши саф тортади.
Ярим финалнинг иккинчи ўйинида амалдаги Жаҳон Чемпиони Германияга қарши кураш олиб борган Франция Антуан Гризманнинг дубли эвазига зафар қучди — 2:0.
Учрашувнинг 45-дақиқасида италиялик ҳакам Никола Рицсоли немислар дарвозаси томон пенальти белгилади. Рефери Бастиан Швайнштайгер тўпни қўли билан ўйнаганини кўра олди. Антуан Гризманн пенальтини аниқ амалга ошириб, Францияни олдинга олиб чиқди.
72-дақиқада Гризманн дублини расмийлаштирди ва мусобақадаги голлари сонини 6 тага етказиб олди. У нафақат Евро—2016 нинг яққол тўпурарига айланиб олди, балки 1 та мусобақада энг кўп гол урган иккинчи футболчи номини қўлга киритди. 1984 йил франциялик бошқа бир футболчи Мишель Платини Европа Чемпионатида 9 та гол уришга муваффақ бўлганди.
Гризманн гол уришидан 10 дақиқа олдин Германия терма жамоасининг асосий ҳимоячиси Жером Боатенг жароҳат олиб майдонни тарк этди. Яна бир асосий ҳимоячи Мац Хуммелс эса дисквалификация сабабли Францияга қарши ўйинни ўтказиб юборди.
10 июль куни бўлиб ўтадиган Франция ва Португалия терма жамоаларининг ўзаро ўйини Евро—2016 ғолибини аниқлаб беради.
[wpse_match id="374480" show_title=1]
Изоҳ (0)