Fransiya mezbonlik qilayotgan Yevro—2016 finalining ikkinchi ishtirokchisi Fransiya terma jamoasi. 10-iyul kuni musobaqa mezboni o‘z tarixida ikkinchi bor hal qiluvchi o‘yinga qadar yetib kelgan Portugaliyaga qarshi saf tortadi.
Yarim finalning ikkinchi o‘yinida amaldagi Jahon Chempioni Germaniyaga qarshi kurash olib borgan Fransiya Antuan Grizmanning dubli evaziga zafar quchdi — 2:0.
Uchrashuvning 45-daqiqasida italiyalik hakam Nikola Ritssoli nemislar darvozasi tomon penalti belgiladi. Referi Bastian Shvaynshtayger to‘pni qo‘li bilan o‘ynaganini ko‘ra oldi. Antuan Grizmann penaltini aniq amalga oshirib, Fransiyani oldinga olib chiqdi.
72-daqiqada Grizmann dublini rasmiylashtirdi va musobaqadagi gollari sonini 6 taga yetkazib oldi. U nafaqat Yevro—2016 ning yaqqol to‘purariga aylanib oldi, balki 1 ta musobaqada eng ko‘p gol urgan ikkinchi futbolchi nomini qo‘lga kiritdi. 1984-yil fransiyalik boshqa bir futbolchi Mishel Platini Yevropa Chempionatida 9 ta gol urishga muvaffaq bo‘lgandi.
Grizmann gol urishidan 10 daqiqa oldin Germaniya terma jamoasining asosiy himoyachisi Jerom Boateng jarohat olib maydonni tark etdi. Yana bir asosiy himoyachi Mats Xummels esa diskvalifikatsiya sababli Fransiyaga qarshi o‘yinni o‘tkazib yubordi.
10-iyul kuni bo‘lib o‘tadigan Fransiya va Portugaliya terma jamoalarining o‘zaro o‘yini Yevro—2016 g‘olibini aniqlab beradi.
[wpse_match id="374480" show_title=1]
Izoh (0)