Нигерияда жангарилар 7 июль, жума куни Италиянинг Eni компаниясига тегишли нефть қувурларини портлатиб юборди. Бу ҳақда «ТАСС» хабар бермоқда.
Нефть қувури Eni компаниясининг Нигериядаги шўъба корхонаси – Nigerian Agip Oil Company’га тегишли. Портлашни содир этган жангарилар объектни қўриқлаётган соқчилар билан отишмага киришган. Ҳужум оқибатида ҳалок бўлган ва яраланганлар ҳақида маълумот берилмаган.Нигерия – Африканинг энг йирик нефть экспортчиси ҳисобланади. Бир қанча қуролланган гуруҳлар мамлакат жанубида, нефть қазиб чиқариш ишлари авж олган жойда нефть даромадидан улуш олиш учун мунтазам равишда қўпорувчиликларни амалга оширади.