Муҳожирлар билан боғлиқ инқирозга муносабат чоралари халқаро ҳуқуқ, шунингдек, камситиш ва бошпана излаётган кишиларни мажбурий қайтаришдан воз кечишга асосланиши лозим. Бу ҳақда 20 июнь, душанбада Халқаро қочоқлар куни муносабати билан БМТ бош котиби Пан Ги Мун маълум қилди, дея хабар беради «ТАСС».
«Биз қочоқлар ва муҳожирлар ҳибсга олиниши ҳолатлари хавотирли даражада ошиб бораётгани, шунингдек, тўсиқлар қурилишини кузатмоқдамиз», — дея таъкидлаган бош котиб. Унинг айтишича, 2015 йили 1 миллиондан ошиқ киши Европада янги ҳаёт бошлаш умидида Ўртаер денгизини кесиб ўтди.
БМТ қочоқлар иши олий комиссари бошқармаси маълумотларига кўра, ўтган йил охирида дунёда уйини мажбурий тарк этганлар сони 65,3 миллион кишини ташкил этган, бу 2014 йилга нисбатан 6 миллион кишига кўп. Мазкур рақамга изоҳ берар экан, бош котиб бу борадаги «вазият мисли кўрилмаган кўламга етгани»ни билдирди.
Изоҳ (0)