АҚШ ва Хитой ҳамкорлигидаги киностудия «Тетрис» ўйинини экранлаштириш учун 80 миллион доллар сарфлайди

Threshold Global Studios «Тетрис» ўйинини экранлаштириш учун 80 миллион доллар сарфлаш ниятида. Фильмни суратга олиш ишлари 2017 йили Хитойда бошланади, дея хабар беради «Интерфакс».

«Илмий-фантастик триллер» деб аталаётган фильм уч қисмдан иборат, у АҚШ ва Хитой ҳамкорлигидаги студиянинг илк лойиҳаси бўлади. Унда хитойлик ва америкалик актёрлар иштирок этади, бироқ уларнинг номи ошкор этилмаган.

«Threshold Global барча маданий қатламларга тааллуқли, глобал бозор учун мўлжалланган фильмларни суратга олади. ‘Тетрис’ тарихдаги энг оммалашган видеоўйинлардан биридир ва бизнинг стратегия учун мос биринчи лойиҳа ҳисобланади», — дейилади студия эгалари (АҚШнинг Threshold Entertainment Group ва Хитойнинг Seven Star Works компаниялари) қўшма баёнотида.

Маълумот учун, «Тетрис» ўйини 1984 йилда собиқ Иттифоқ дастурчиси Алексей Пажитнов томонидан яратилган бўлиб, шундан бери ўйин 500 миллион маротабадан кўпроқ юклаб олинган.