Toshkent markazida joylashgan Orzu supermarketi yopilishga tayyorgarlik ko‘rmoqda. Bu haqda, supermarket ma’muriyatidagi manbalarga asoslanib, “Gazeta.uz” xabar bermoqda.
City Center Orzu’ning Facebook’dagi sahifasida 13-may kuni mahsulotlarga 50 foizlik chegirma e’lon qilingan edi. Keyinroq supermarket jamg‘arma karta egalariga yig‘ilgan mablag‘ni chegirmali mahsulotlarga almashtirishni taklif qildi.
“Gazeta.uz”ga ma’lum qilishlaricha, may oyi oxirida supermarket ta’mirlash ishlari uchun yopiladi. Ta’mirlash ishlari yakuniga yetganidan so‘ng, u “Korzinka.uz” supermarketlar tarmog‘ining bir qismiga aylanadi. Mazkur yangilik yuzasidan tarmoq rahbari Zafar Hoshimov “Daryo” internet-nashriga izoh berdi.
“Shaharning qoq markazidagi gavjum hududda joylashgan City Center Orzu azaldan o‘zgacha fayzli va e’tiborga molik savdo majmualaridan biri hisoblanadi. Avvalo, mazkur majmua rahbarlari bizga taklif bilan chiqqani bir xursand qilgan bo‘lsa, bu yerda ‘Korzinka.uz’ning yangi marketi ochilib, xaridorlarga xizmat ko‘rsata boshlashi ikki karra quvontirdi”, — dedi “Korzinka.uz” supermarketlar tarmog‘i rahbari Zafar Hoshimov “Daryo” internet-nashriga.
Zafar Hoshimovning so‘zlariga ko‘ra, tarmoq yaqin vaqt ichida Toshkentning boshqa hududlarida ham o‘zining yangi supermarketlarini ochadi. Buyuk Ipak yo‘li ko‘chasidagi “Salom” choyxonasi yonida yangi qurilgan “Salom” savdo markazi 1-qavatida va sobiq aviazavod hududi oldidagi yangi savdo markazida faoliyat boshlaydigan marketlar shular jumlasidandir. Har ikkala savdo markazida, “Korzinka.uz”dan tashqari, Redtag oilaviy kiyim-kechak va uy jihozlari do‘konlari ham bo‘ladi.
“Shu bilan birga, O‘zbekistonning boshqa hududlarida ham korxonamiz shu’balarini ochish harakatidamiz. Ayni damda Buxoro va Andijon shaharlarida ‘Korzinka.uz’ supermarketlari uchun binolar qurish ishlari jadallik bilan olib borilmoqda”, — deya qo‘shimcha qildi tarmoq rahbari Zafar Hoshimov.
Orzu supermarketi 2013-yilning oktabrida City Center Orzu savdo-ko‘ngilochar majmuasi negizida ochilgan edi. “Gazeta.uz”ning aniqlik kiritishicha, majmuaning ovqatlanish, ko‘ngilochar joylari va do‘konlari o‘z faoliyatini avvalgi tartibda davom ettiradi.
Izoh (0)