Австралияда «Боинг»нинг Донбассдаги ҳалокатини «оммавий қотиллик» деб тан олишди

Австралиянинг Янги Жанубий Уэльс штати коронери Майкл Барнс Малайзия «Боинг»ининг Донбассдаги авиаҳалокатида одамларнинг ўлими «оммавий қотиллик»нинг бир қисми бўлганини эътироф этди, деб ёзади «РБК».

Барнс сўзларига кўра, ўлимларнинг барчаси «жанговар каллак портлаши туфайли самолёт катта баландликдан қулаши натижасида олинган шикастланишлар» оқибатида юз берган. «Ҳалокатли жароҳатлар лайнерга атайлаб жанговар каллакли ракета отган, ҳалигача аниқланмаган одам ёки одамлар томонидан берилган», — дея таъкидлади коронер.

«Коронерлар жиноий айбни тергов қилмайди, аммо ушбу ўлимлар қўпол ялпи қотилликнинг бир қисми бўлганини тан олмаслик беҳуда сафсатабозлик бўлган бўларди», — деди у.

Эслатиб ўтамиз, Malaysia Airlines’нинг Амстердамдан Куала-Лумпурга MH17 рейси билан учиб кетаётган «Боинг-777» самолёти 2014 йил 17 июль куни қулаган эди. Тахминларга кўра, лайнер Донбасс ҳудудидан уриб туширилган. Самолёт бортида бўлган 298 кишининг барчаси ҳалок бўлган.

Маълумот учун, коронер — номаълум вазиятларда юз берган ўлим сабабларини аниқлаш каби вазифалар билан шуғулланадиган мансабдор шахс.