«Тошкент-Аэро» ихтисослаштирилган божхона комплекси ходимлари божхона чегаралари орқали нақд хорижий валюталарнинг ноқонуний олиб ўтилишига қарши чора-тадбирларни амалга оширмоқда. Бу ҳақда «Тошкент-Аэро» ихтисослаштирилган божхона комплекси матбуот хизмати «Дарё»га маълум қилди.
Натижада, жорий йилнинг ўтган даври мобайнида Тошкент халқаро аэропорти орқали божхоначилар томонидан ҳуқуқни муҳофаза қилувчи бошқа идоралар вакиллари билан ҳамкорликда аниқланган 58 та божхона қоидабузарлик ҳолатида 212 миллион сўмдан ортиқ эквивалентдаги нақд хорижий валюталарнинг ноқонуний равишда олиб ўтилишига чек қўйилди.
Жумладан, Олмаота шаҳрига парвози олдидан қўшни давлат фуқароси А.Сергеева (мақоладаги барча исм-шарифлар ўзгартирилган) божхона назорати вақтида шахсий кўрикдан ўтказилганда, чўнтагида йўловчи божхона декларациясида ва божхона ходимининг оғзаки сўрови пайтида маълум қилинмаган 2100 АҚШ долларини яширганча олиб чиқишга урингани фош бўлди.
Пойтахтдан Екатеринбургга учиш олдидан божхона кўриги давомида навоийлик Т.Зафарова сумкасидаги 2400 АҚШ долларини йўловчи божхона баённомасида акс эттирмаганлиги аниқланди. Новосибирскка парвоз қилаётган россиялик Н.Ивановага тегишли сумка божхона кўригидан ўтказилганда, унга ноқонуний тарзда олиб чиқиш мақсадида йўловчи божхона декларациясида ва божхона ходимининг оғзаки сўрови пайтида маълум қилинмаган 4200 АҚШ доллари яширилганлиги маълум бўлди.
Бангкокка отланган бухоролик Ж.Олимова 4910 АҚШ долларини йўловчи божхона декларациясида қайд қилмаганлиги аниқланди.
Ҳозирда мазкур ҳолатлар юзасидан божхона текширувлари ва суриштирув жараёнлари давом эттирилмоқда.
Изоҳ (0)