Xiaomi Mi 5 маҳсулдорлик бўйича ўз рақобатчиларини ортда қолдирди

Хитойнинг янги флагман смартфони 19 ой давомида ишлаб чиқилган. Қиёсий тестлар Xiaomi Mi 5 маҳсулдорлик бўйича таниқли брендларга тегишли рақобатчиларини муваффақиятли тарзда ортда қолдиришини, шу билан бирга, анча арзон туришини кўрсатди, деб ёзади «Hi-tech.mail.ru».

GFX 3.1 ва Basemark X бенчмаркларида смартфон Samsung Galaxy S7, Sony Xperia Z5 ва бошқа қатор машҳур қурилмаларни (Apple смартфонларидан ташқари — iOS учун тест версияси ҳозирча йўқ)дан кўра баландроқ натижаларни кўрсатди. Basemark OS тестида эса у фақат iPhone 6s’дан ортда қолди.

AnTuTu бенчмаркидаги бир ядроли тестда Хитой флагманидан фақат Apple смартфонигина ўзиб кетди. Кўп ядролида, аксинча, Xiaomi Mi 5 натижаси iPhone 6s’никидан юқори, аммо Samsung Galaxy S7’никидан пастроқ бўлиб чиқди.

Xiaomi Mi 5 смартфони февраль охирида расман тақдим этилди. 5,15 дюймли, 1800 пикселли дисплей пастида Home тугмаси жойлашган, у бармоқ изи сканери билан жиҳозланган. Смартфон ўлчамлари 69,2×144,5×7,25 миллиметрга тенг. Орқа панел учун 3D-шишадан фойдаланилган.

Xiaomi Mi 5 тўрт ядроли Qualcomm Snapdragon 820 чипсети, 3 Гб тезкор хотира, 3000 мА/соат сиғимли аккумулятор, 16 мегапикселли асосий ва 4 мегапикселли олд камерага эга. Смартфон Android 6.0 Marshmallow операцион тизимини қўллаб-қувватлайди, аммо ўзининг MIUI7 операцион тизимидан фойдаланади.