Xitoyning yangi flagman smartfoni 19 oy davomida ishlab chiqilgan. Qiyosiy testlar Xiaomi Mi 5 mahsuldorlik bo‘yicha taniqli brendlarga tegishli raqobatchilarini muvaffaqiyatli tarzda ortda qoldirishini, shu bilan birga, ancha arzon turishini ko‘rsatdi, deb yozadi “Hi-tech.mail.ru”.
GFX 3.1 va Basemark X benchmarklarida smartfon Samsung Galaxy S7, Sony Xperia Z5 va boshqa qator mashhur qurilmalarni (Apple smartfonlaridan tashqari — iOS uchun test versiyasi hozircha yo‘q)dan ko‘ra balandroq natijalarni ko‘rsatdi. Basemark OS testida esa u faqat iPhone 6s’dan ortda qoldi.
AnTuTu benchmarkidagi bir yadroli testda Xitoy flagmanidan faqat Apple smartfonigina o‘zib ketdi. Ko‘p yadrolida, aksincha, Xiaomi Mi 5 natijasi iPhone 6s’nikidan yuqori, ammo Samsung Galaxy S7’nikidan pastroq bo‘lib chiqdi.
Xiaomi Mi 5 smartfoni fevral oxirida rasman taqdim etildi. 5,15 dyuymli, 1800 pikselli displey pastida Home tugmasi joylashgan, u barmoq izi skaneri bilan jihozlangan. Smartfon o‘lchamlari 69,2×144,5×7,25 millimetrga teng. Orqa panel uchun 3D-shishadan foydalanilgan.
Xiaomi Mi 5 to‘rt yadroli Qualcomm Snapdragon 820 chipseti, 3 Gb tezkor xotira, 3000 mA/soat sig‘imli akkumulyator, 16 megapikselli asosiy va 4 megapikselli old kameraga ega. Smartfon Android 6.0 Marshmallow operatsion tizimini qo‘llab-quvvatlaydi, ammo o‘zining MIUI7 operatsion tizimidan foydalanadi.
Izoh (0)