Бельгия полицияси ходимлари 22 март, сешанба куни Брюсселда амалга оширилган бир қатор терактларга алоқадор икки гумондорни ҳибсга олди. Бу ҳақда Daily Mail нашри маълумотига таяниб, «Интерфакс» хабар беради.
Гумонланувчиларни ҳибсга олиш портлаш содир бўлган «Мальбек» метро станциясидан 1,5 километр узоқликда амалга оширилган.
Нашрнинг маълум қилишича, хавфсизлик хизмати аллақачон Брюссель аэропорти кузатув камераларидаги лавҳаларни қўлга киритган. Ундаги лавҳаларда, жумладан, худкуш камарини портлатаётган террорчи акс этган.
Эслатиб ўтамиз, 22 март, сешанба куни Брюссель аэропорти ва метросида камида учта портлаш юз берди. Портлашлар оқибатида, турли ҳисоб-китобларга кўра, 20—30 киши ҳалок бўлган (расмий маълумотлар эълон қилинганича йўқ). Терактлар учун жавобгарликни ИШИД террорчилик ташкилоти ўз зиммасига олди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)