Брюсселдаги портлашлар. Бельгия пойтахтига уюштирилган ҳужум ҳақида нималар маълум?

Бельгия пойтахти Брюсселда 22 март, сешанба куни камида учта портлаш юз берди. Дастлаб иккита портловчи ускуна «Завентем» аэропортида ҳаракатга келтирилди. Орадан бир соат ўтиб, метро бекатида портлаш юз берди. Ҳукумат аэропортдаги ҳодисани теракт деб расман тан олди. Портлашлар оқибатида 20 дан зиёд одам ҳалок бўлди; бир неча ўнлаб киши тан жароҳати олди. Meduza нашри Брюсселга уюштирилган ҳужум ҳақида маълум жиҳатларни бир саҳифага жамлади.

Брюсселдаги «Завентем» аэропортининг учиб кетиш залида маҳаллий вақт билан тонгги соат 8:00 атрофида икки портлаш юз берди. Расмий маълумотларга кўра, портлашлар оқибатида камида 13 киши ҳалок бўлган, яна 35 киши турли даражада тан жароҳати олган. Фотосуратларда учиб кетиш залининг томи қисман қулагани, ойналар синиб кетганини кўриш мумкин. Франция нашрларининг маълум қилишича, учиб кетиш залида яна бир портлаш бўлгани, учиш-қўниш йўлида эса бошқа бир бомба портлагани ҳақида хабар берди, бироқ бу ахборот тасдиқланмади.

https://twitter.com/GillesKLEIN/status/712203174237573120

Орадан бир соат ўтиб Брюссель марказидаги «Малбек» метро бекатида (ёки унинг ёнида) портлаш юз берди. ОАВ маълумотларига кўра, ҳодиса оқибатида 10 нафардан 15 нафаргача одам ҳалок бўлган. Норасмий ахборотга кўра, жабрланувчилар сони 55 кишига етган. Бельгия пойтахтидаги метрода поездлар ҳаракати тўхтатилагн. Ижтимоий тармоқларда эса бекатлар оралиғида тўхтатилган поездларнинг йўловчилари тоннеллардан чиқиб келаётгани тасвирланган видеолар эълон қилинган.

https://twitter.com/zhuyida/status/712197455694143488

Ҳукумат ҳодисалар террорчилик ҳаракатлари эканлигини расман тан олди. Аэропортдаги бир портлаш террорчи-худкуш томонидан амалга оширилган; шунингдек, аэропортга портловчи ускуна ўрнатилган (метродаги портлашни ким уюштиргани номаълум). Норасмий маълумотларга кўра, портлашлардан аввал аэропортда отишма овозлари ва араб тилидаги бақириқлар эшитилган. Шунингдек, тасдиқланмаган ахборотга кўра, аэропортда учинчи бомба ҳам топилган, лекин у портламаган.

Бельгияда террорчилик таҳдидининг энг юқори даражаси эълон қилинган. Париждан Thalys ва Лондондан Eurostar тезюрар поездларининг ҳаракати тўхтатилган. Бельгия ҳукумати Франция билан чегарани вақтинча ёпишга қарор қилди. Париж ва Лондонда давлат раҳбарлари хавфсизлик бўйича фавқулодда мажлислар чақирди. Брюссель аэропорти 23 март соат 6:00 гача ёпиқ бўлади.

• Брюсселдаги терактлар

Брюсселдаги портлашлардан бир неча кун аввал Париждаги терактларга алоқадор деб гумон қилинаётган Салоҳ Абдисалом ҳибсга олинган эди. У 2015 йил ноябрида Бельгияга қочган, шундан сўнг унинг изи йўқолган эди; уни фақатгина 18 март куни қўлга олишга муваффақ бўлинди. Бельгия ташқи ишлар вазири Диде Рейндернинг маълум қилишича, Абдисалом Брюсселда терактлар уюштиришга тайёргарлик кўрган, бироқ айнан қандай терактлар ҳақида сўз бораётганига аниқлик киритмаган. NBC’нинг Европа махсус хизматларидаги манбага асосланиб хабар беришича, Бельгия пойтахтига уюштирилган ҳужум ортида ИШИД турибди, деб гумон қилинмоқда.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.