Курдистон Миллий конгресси Рожава — Сурия ҳудудидаги Ғарбий Курдистонда бошланган федераллашув жараёнини қўллаб-қувватлади. Бу ҳақда «ТАСС» хабар бермоқда.
Конгресс вакили Салоҳиддин Соро матбуот анжумани чоғида Ироқ ва Сурия курдлари ИШИДга қарши курашда бирдамлигини кўрсата олганини ва умумий съезд ўтказилмаганига қарамай, Хасакадаги съездда қабул қилинган қарор барча курдлар томонидан қўллаб-қувватланишини билдирди.
«Ғарбий Курдистоннинг федераллашув йўлидаги фаолияти — адолатсиз Лозанна шартномасидан четлашиш сари бир қадам», — деб таъкидлаб ўтди Соро, 1923 йилда имзоланиб, Усмонли салтанатининг парчаланиши ҳамда унинг ўрнида бугунги давлатларнинг шаклланишига қонуний тус берган ҳужжатни назарда тутиб.
Шунингдек, Миллий конгресс вакили курдларнинг ўз-ўзини бошқариш ваколатларини кенгайтириш борасидаги фаолияти қўшни халқларга қарши қаратилмаганини айтиб ўтди.
«Сурия курдлари барча халқлар бирга яшайдиган ягона демократик Сурияга садоқатли эканлигини кўп бора исботлаган», — деди у.
Эслатиб ўтамиз, бир муддат илгари Суриянинг Хасака вилоятидаги Румайланда ўтган съездда иштирок этган 30 дан ортиқ сиёсий партия аъзолари мамлакат шимолида минтақавий федератив маъмурият ташкил этилганини расман эълон қилган эди.
Изоҳ (0)