«Ўзбекнаво» эстрада бирлашмаси ташаббуси билан Ўзбекистон давлат санъат ва маданият институтида 2016 йил давомида эстрада ижодкорлари махсус малака ошириш ўқув курсларида таҳсил олмоқда, деб ёзади «Ўзбекнаво» матбуот хизмати.
22 февраль куни ушбу ўқув курсининг илк кириш дарси бўлиб ўтди. Унда Ўзбекистон санъат ва маданият институти ректори, профессор Б.Сайфуллаев, Маданият ва спорт ишлари вазири ўринбосари – «Ўзбекнаво» эстрада бирлашмаси Бош директори Ф. Жўраев, Педагог кадрларни қайта тайёрлаш ва уларнинг малакасини ошириш тармоқ маркази директори О. Ҳасанов ва бошқа институт профессор-ўқитувчилари қатнашди.
Дарсда малака ошириш курсининг долзарблиги, ҳуқуқий асослари, саҳна маданияти, институт тартиб-қоидалари юзасидан тушунча берилди. Шунингдек, ёш эстрада хонандаларига ушбу ўқув даргоҳидан ўзларига келажакда ҳамкорлик қиладиган устоз танлаш таклифлари билдирилди.
Ўқув курсидан кўзланган мақсад эстрада ижодкорларини ҳар томонлама қўллаб-қувватлаш, уларнинг эркин ижод қилишига кўмаклашиш, ҳозирги замон талабларини инобатга олган ҳолда мутахассислар ёрдамида ижодкорлар учун зарурий бўлган билим ва кўникмалар олишига шароит яратиш, жамият тараққиётида санъаткор ижодининг аҳамиятини янада кучайтириш, уларни ўз ижодлари орқали ёшлар тарбияси, оммага ватанпарварлик руҳини сингдириш, тинчликни сақлаш, Ватан равнақи йўлида фидокорона меҳнат қилиш, таҳдидлардан огоҳликка чақириш каби йўналишларда хизмат қилишга ундашдан иборат.
Ушбу ўқув курсларида мамлакатда демократик ислоҳотларни янада чуқурлаштириш ва фуқаролик жамиятини ривожлантириш, ахборот хавфсизлиги, нутқ ва саҳна маданияти, вокал санъати, саҳна ҳаракати фанлари ўқув дастурига киритилган.
Изоҳ (0)