Улуғбек Қодиров ўзини «икки карра алданган актёр» деб таърифлади

Актёр Улуғбек Қодиров режиссёр Жаҳонгир Аҳмедовнинг «Мажнун» фильмидаги бўрилар билан боғлиқ саҳнада етарли даражада эҳтиёт чоралари кўрилмаганидан нолиди. Бу ҳақда «Даракчи» газетаси хабар бермоқда.

«‘Мажнун’ фильмига ҳеч қандай эътирозим йўқ. Сценарий, режиссура, операторлик ишлари кўнгилдагидек. Бироқ актёрни икки карра алдаш — куракда турмайдиган иш. Ҳаётимни хавф остига қўйиб, бўрилар билан суратга тушганимга яраша қандайдир хавфсизлик чораларини кўриш шарт эди», — деди Улуғбек Қодиров.

«Очиғи, режиссёр ‘актёрга бирор кор-ҳол бўлса ҳам, фильм суратга олиниб бўлинган-ку’, қабилида иш тутганидан қаттиқ ранжидим. Эртага бошқа режиссёрларимиз ҳам ‘фильмим зўр чиқсин’, дея тимсоҳлар орасига ташлаб қўймаса эди... Суратга олиш ишлари тугагач эса режиссёр қўнғироқ ҳам қилмади. Бу муносабатни қандай тушуниш керак?», — дея қўшимча қилди актёр.

Аввалроқ «Мажнун» фильми режиссёри Жаҳонгир Аҳмедов фильмни суратга олиш жараёнида Улуғбек Қодиров жонбозлик кўрсатгани, хавфли саҳналарда ҳам каскадёрлардан воз кечгани ҳақида интервью берганди.

• Актёр Улуғбек Қодировга бўрилар ҳужум қилди