«Ўзбеккино» буюртмасига асосан «Бўйноқ» номли мультфильм суратга олинди

Cinema Servis компанияси «Ўзбеккино» миллий агентлиги буюртмаси асосида давомийлиги 10 дақиқа бўлган «Бўйноқ» номли мультфильмни суратга олди. Бу ҳақда мультфильмни тайёрлашда қатнашган Абдулатиф Ҳайдаров «Дарё» нашрига маълум қилди.

Нормурод Норқобил сценарийси асосида режиссёр Жавлон Турдихўжаев томонидан бир йил давомида тайёрланган мультфильм жасур ва қўрқмас, курашувчан посбон ит ҳақида ҳикоя қилади.

Унда, шунингдек, болакай — Рустам, мушук — Бароқвой ва бўрилар ҳам иштирок этади. «Мазкур фильм болажонларга зийраклик ва чаққонлик, уддабуронлик ҳамда довюраклик каби ҳислатларни англашларида ёрдам беради», — дейди Абдулатиф Ҳайдаров.

Мультфильмни яратишда Абдулатиф Ҳайдаров, Дилшод Дўстмуҳаммедов, Жавлон Турдихўжаев, Аброр Аҳмадий, Самариддин Абдуназаров, Шуҳрат Асаев, Зилола Ҳамидова сингари ижодкорлар меҳнат қилган.

Тайёр ҳолатга келган мультфильм кўрик учун «Ўзбеккино» Миллий агентлигига топширилган ва Бадиий кенгаш тасдиғидан ўтган. Мультфильм премьераси яқин кунлар ичида Ўзбекистон Миллий телерадиокомпанияси телеканалларида бўлиб ўтади.

Маълумот учун, Cinema Servis ижодий жамоаси бунгача «Самовий меҳмон», «Тошбақа», «Ақлтой» каби мультипликацион фильмларни ҳам суратга олганди.