Ўзбекистонда Украинадан келаётган товарлардан импорт тўлови ундириш бекор қилинди. «Газета.uz» сайтининг Ташқи иқтисодий алоқалар, инвестициялар ва савдо вазирлиги матбуот хизмати хабарига таяниб ёзишича, тегишли қарор 18 февраль куни Вазирлар Маҳкамаси томонидан эълон қилинди.
Барча давлатлардан олиб кирилаётган товарлардан 5-10 фоизлик импорт тўлови Украинада 2015 йилнинг 26 февралидан 12 ой муддатга кучга кирган эди. Аммо 2015 йилнинг 24 декабрь куни Украинада «Ташқи иқтисодий фаолиятни жонлантириш чора-тадбирлари тўғрисида»ги қонун қабул қилинди. Унга кўра, 2016 йилнинг 1 январидан эътиборан товарлардан қўшимча импорт тўлови ундирилишининг тўхтатилиши кўзда тутилган.
Ўзбекистоннинг иқтисодий манфаатларини ҳимоя қилиш мақсадида ҳамда Украина томонидан халқаро келишувларда кўзда тутилган мажбуриятларнинг бажарилмаётгани туфайли 20 июнь куни Вазирлар Маҳкамаси «Украинада ишлаб чиқарилган импорт товарларга нисбатан жавоб чораларини жорий этиш тўғрисида»ги қарорни қабул қилганди. Бу ҳужжатда 1 июлдан бошлаб 12 ой муддатга Украинадан келаётган товарларни қўшимча импорт йиғимига тортиш кўзда тутилганди.
Украинада «Ташқи иқтисодий фаолиятни жонлантириш чора-тадбирлари тўғрисида»ги қонуннинг кучга кириши туфайли Вазирлар Маҳкамасининг 18 февралдаги қарори билан ушбу чоралар муддатидан илгари бекор қилинди.
Изоҳ (0)