2012 йил 19 январь куни Нью-Йоркдаги машҳур Карнеги Холл концерт залида ўзбекистонлик пианиночи Лола Остонова биринчи бора концерт берди. Бу ҳақда журналист Мавлон Шукурзода ўз мақоласида батафсил ёритиб берди.
American Cancer Society (Америка саратон жамияти) томонидан ташкил этилган хайрия концертига 3 мингга яқин томошабин келди, ундан тушган маблағ жамият ҳисобига кўчирилди.
New York Daily News ёзишича, томошабинлар концертни катта мароқ билан тинглаган. Тринидад ва Тобаго маликаси Мореме Шашу Харви Лолани пианино билан «рақсга тушди» ва унга «севги изҳор қилди» дея таърифлаган бўлса, унинг турмуш ўртоғи Луи пианиночини «мумтоз мусиқа Леди Гагаси» деб атади.
Остонованинг яккахон концертини ушбу кеча ташкилотчиси, таниқли миллиардер Дональд Трамп очиб берди, у, шунингдек, концертда раислик ҳам қилди. Таъкидлаш жоиз, концерт ташкилотчилари Лолани кўплаб номзодлар орасидан танлаб олди.
Афсонавий актриса Жули Эндрюс эса ёш ўзбек пианиночисини оммага таништирди. Бундан ташқари, концертда Пирс Броснан, Энн Керри, Энн Хэтэуэй, Рошумба Уильямс каби мусиқа, кино ва телевидение юлдузлари томошабин сифатида иштирок этди.
Лола Остонова 1985 йилда Тошкентда асли самарқандлик оилада дунёга келган. Фортепиано бўйича биринчи устози ўз онасидир. Кейинроқ Успенский номидаги мусиқий мактабда таълим олган. Мактаб чоғларидаёқ халқаро фестиваль ва концертларда иштирок этган. Мактабни битиргач, Лола АҚШдаги Уильям Марш Райс университетига ўқишга кирган. У кўплаб халқаро танловлар ғолибидир.
Изоҳ (0)