Режиссёр Рустам Саъдиевнинг «Барон» фильми премьерасидан бир ҳафта ўтиб, унинг сифатли нусхаси, «видеоқароқчилар»нинг хатти-ҳаракатлари сабаб, қўл телефонлари ва дисклар орқали тарқалишга улгурди. Бу ҳақда «Қалампир» хабар бермоқда.
«Фильмнинг диски тарқаб кетганидан хабарим бор. Бироқ ‘видеоқароқчилар’нинг қўлидаги дискдаги материал катта экранларда намойиш этилаётганидан фильмдан анча фарқ қилади. Фильмнинг хомаки нусхаси бозорлар ва диск дўконларида сотиляптими ёки йўқ, бунисидан хабардор эмасман», — деди режиссёр.
«Қалампир»нинг қайд этишича, бу воқеа режиссёр Рустам Саъдиев билан биринчи марта рўй бераётгани йўқ. Унинг ўтган йил катта шов-шувларга сабаб бўлган «Сотқин» номли картинаси ҳам катта экранларга чиққанидан бир ой ўтар-ўтмас «қароқчилар»нинг қўлига тушган эди.
«Барон» фильми премьераси 16 январь куни Алишер Навоий номли киносаройида бўлиб ўтганди. 21—24 январь кунлари давомида киносаройнинг барча 12 залида «Барон» намойиш этилган, хусусан, 24 январдаги намойишлар учун 7,5 мингта чипта сотилган, 2 минг киши чипта ололмай қолган.
Изоҳ (0)