Хонанда, захирадаги капитан Юлдуз Абдуллаева Ватан ҳимояси йўлида эркаклар билан бир сафда хизмат қилиш аёл киши учун қийин эканлигини тан олди. У бу ҳақда «Бекажон» газетасига берган интервьюсида айтиб ўтди.
«Санъатдаги фаолиятим туфайли ҳарбий хизматчи бўлиш бахтига муяссар бўлдим. Ҳарбийларга аталган қўшиқларимнинг яралиши ҳам шу фаолиятим билан чамбарчас боғлиқ. Кўп бўлмаса-да, бу мавзуда куйлаган қўшиқларим жуда тез оммалашган. Атрофимдагилар: ‘Сизга кўпроқ ҳарбий йўналишдаги қўшиқлар ярашади’, — дейишади», — деди хонанда.
«‘Лейтенант’, ‘Аскар’, ‘Ўзбекистон офицерлари’ сингари ватанпарварлик руҳидаги қўшиқларни куйлаш ижрочига катта масъулият юклайди. Сабаби, ижрочи қўшиқдаги ватанпарварлик руҳини ўзига сингдира олиши ва чин юракдан ижро этиши, шу билан бирга, уни тингловчига етказа билиши лозим», — деди Юлдуз Абдуллаева.
«Мен ўн йилча чегара қўшинларида хизмат қилдим. Бу йилларда янада мукаммалроқ инсонга айлана олдим, десам хато бўлмайди», — дея қўшимча қилди хонанда.
Изоҳ (0)