Қирғизистон Россияни 3 млрд долларлик лойиҳаларни молиялаштиришга қодир эмас деб топди

Россия нефть нархининг тушиб кетиши оқибатида олдинроқ Қирғизистон билан келишиб қўйилган, умумий қиймати 3 миллиард долларга яқин бўлган иккита лойиҳани молиялаштиришга қодир эмас. Бу ҳақда 24 декабрь куни йиллик матбуот анжуманида Қирғизистон президенти Алмазбек Атамбаев айтиб ўтди, деб хабар қилади «РБК».

«Россия иқтисодиёти чўққида бўлмаган, нефть нархи эса тушишда давом этаётган бир пайтда, ўйлашимча, Россия объектив сабабларга кўра бу келишувларни амалга ошириш ҳолатида эмас», — деди Атабмаев. У юзага келган ушбу вазиятни Россия президенти Владимир Путин билан муҳокама қилганини қўшимча қилди.

Владимир Путин 2012 йилда Бишкек шаҳрига ташриф буюрганда Қирғизистоннинг 500 миллион долларга яқин қарзидан воз кечган эди. Бундан ташқари, Россия Қирғизистонга иккита ГЕС қуриб беришни ваъда қилган. Иккала лойиҳанинг умумий қиймати 3 миллиард доллардан кўпроққа баҳоланган.

Атамбаевнинг таъкидлашича, лойиҳалар тўхтатилмайди ва мамлакат бошқа инвесторларни излайди.