Rossiya neft narxining tushib ketishi oqibatida oldinroq Qirg‘iziston bilan kelishib qo‘yilgan, umumiy qiymati 3 milliard dollarga yaqin bo‘lgan ikkita loyihani moliyalashtirishga qodir emas. Bu haqda 24-dekabr kuni yillik matbuot anjumanida Qirg‘iziston prezidenti Almazbek Atambayev aytib o‘tdi, deb xabar qiladi “RBK”.
“Rossiya iqtisodiyoti cho‘qqida bo‘lmagan, neft narxi esa tushishda davom etayotgan bir paytda, o‘ylashimcha, Rossiya obyektiv sabablarga ko‘ra bu kelishuvlarni amalga oshirish holatida emas”, — dedi Atabmayev. U yuzaga kelgan ushbu vaziyatni Rossiya prezidenti Vladimir Putin bilan muhokama qilganini qo‘shimcha qildi.
Vladimir Putin 2012-yilda Bishkek shahriga tashrif buyurganda Qirg‘izistonning 500 million dollarga yaqin qarzidan voz kechgan edi. Bundan tashqari, Rossiya Qirg‘izistonga ikkita GES qurib berishni va’da qilgan. Ikkala loyihaning umumiy qiymati 3 milliard dollardan ko‘proqqa baholangan.
Atambayevning ta’kidlashicha, loyihalar to‘xtatilmaydi va mamlakat boshqa investorlarni izlaydi.
Izoh (0)