Халқаро футбол федерацияси (ФИФА) Европа футбол ассоциациялари иттифоқи (УЕФА) раҳбари Мишель Платинига Ахлоқ қўмитаси қарори устидан Лозаннадаги Спорт арбитраж суди (CAS)га мурожаат қилишига рухсат бермади. ФИФА Платини олдин ташкилотнинг Апелляция қўмитасига мурожаат этиши лозимлигини маълум қилди, деб хабар беради «ТАСС».
ФИФА Ахлоқ қўмитаси 21 декабрь, душанба куни Платини ва ФИФА раҳбари Йозеф Блаттерни футбол фаолияти билан боғлиқ ҳар қандай ишдан 8 йилга четлаштирган эди.
2016 йилнинг 26 январь куни ФИФА сайлов қўмитаси ташкилот раҳбарлигига номзодларнинг қанчалик талабга жавоб бериши ҳақида ўз хулосаларини эълон қилади. Платини 26 январгача Ахлоқ қўмитасининг қарорини бекор қилинишига эришиш учун Апелляция қўмитасини айланиб ўтиб, тўғридан-тўғри CAS’га шикоят билан чиқишга тайёрланаётганди. Аммо 22 декабрь куни ФИФА Платинининг ҳуқуқшуносларини француз амалдори фақатгина ФИФА апелляция қўмитаси қароридан кейин CAS’га мурожаат қилиши мумкинлиги ҳақида огоҳлантирди.
УЕФА раҳбарининг адвокатлари Платинининг сайловларда қатнашишига ФИФА атайлаб халақит қилмоқда, деб ҳисобламоқда.
Изоҳ (0)