Исроил Ҳарбий-ҳаво кучлари Ғазо секторининг ракета зарбасига жавобан авиация ҳужуми уюштирди

Исроил авиацияси Ғазо секторининг ракета ҳужумига жавобан фаластинлик жангарилар позицияларига ҳужум уюштирди. Бу ҳақда армия матбуот хизматига таяниб, «РИА Новости» хабар беради.

Дастлабки маълумотларга қараганда, ҳужумлар оқибатида ҳар иккала томондан ҳеч ким жабрланмаган.

«Кеча, 13 декабрь куни кечқурун Ғазо секторидан Исроил жанубига ракета учирилди. Жабрланганлар ҳақида маълумот келиб тушмади. Бунга жавобан Исроил Ҳарбий-ҳаво кучлари Ғазо секторининг шимолий ва марказий қисмларидаги ‘Ҳамас’нинг икки ҳарбий постига зарба берди», — дейилади хабарда.

Манбаларда маълум қилинишича, Ғазо секторидаги «Ҳамас» ҳаракати жангариларининг машқ лагери, шунингдек, унинг ҳарбий-денгиз бўлинмаси базаси бомбардимон қилинган.